នៅពេលយើងឃើញអត្ថបទល្អៗជាច្រើនមិនថាក្នុង WordPress ឬ Blogger ឬក៏ប្រព័ន្ធណាផ្សេងទៀតទេ យើងចេះតែឆ្ងល់ថា ធ្វើម៉េចសរសេរបានល្អដូចគេ? ធ្វើម៉េចក៏គេសំបូរគំនិតអ្វីម្ល៉េះ? ឃ្លាប្រយោគក៏ស្អាត រូបភាពក៏ទាក់ទាញ អ្នកណាក៏ចង់ធ្វើឱយបានដូចដែរ។
យ៉ាងណាមិញ យើងក៏មានសមត្ថភាពដែរ ដូចជាខ្ញុំដែលមានសមត្ថភាពអានកំនត់ហេតុគេមិនចេះហត់ មានសមត្ថភាពចាប់រកកំហុសគេ មានសមត្ថភាពសួរសំនួរមួយសែនបញ្ហា ទាស់តែត្រង់ថា ខ្ញុំមិនទាន់ចេះរៀបរៀងឱយបានក្បោះក្បាយជាភាសាមនុស្សស្ដាប់បាន។ បើអ្នកសាកល្បងគិតឡើងវិញថាអ្នកពូកែអ្វីខ្លះអ្នកនឹងដឹងថាអ្នកក៏មិនមែនជាមនុស្សឥតប្រយោជន៍នោះទេ។ កំនត់ហេតុអាចត្រូវបានបង្កើតឡើងសំរាប់កត់ត្រាសកម្មភាពប្រចាំថ្ងៃរបស់អ្នក អាចកត់ត្រាពីអារម្មណ៍របស់អ្នក កត់ពីអ្វីដែលអ្នកយល់ថាចំនេះអ្នកបានកើនឡើងក្នុងថ្ងៃនេះ។ អ្នកនឹងរីករាយនៅពេលមានសំនៅកំនត់ហេតុផ្ទាល់ខ្លួននៅថ្ងៃមុខទោះជាមានតែអ្នកអានតែម្នាក់គត់ក៏ដោយ។ កំនត់ហេតុផ្សេងទៀតបង្កើតឡើងសំដៅបង្កើតជាតិប្រៃរបស់ទឹកមាត់តាមរយៈសំនេររបស់ខ្លួន ព្រោះសំដីដែលនិយាយហួសទៅមិនមានឯកសារកត់ទុកក៏ដូចជា នោម ជុះទៅក្នុងទន្លេចោលបាត់ដោយមិនបានទុកធ្វើជីដូច្នោះឯង។
កំនត់ហេតុផ្សេងទៀត សំដៅទាក់ទាញអ្នកអានឱយបានច្រើនតាមការរៀបរាប់ពីហេតុការណ៍ផ្សេងៗទៅតាមជំនាញរបស់គេ។ អ្នករកស៊ីសរសេរអំពីគុណសម្បត្តិផលិតផលរបស់គេ អ្នកសិក្សាសរសេរអំពីការរីកចំរើននៃការស្រាវជ្រាវវិទ្យាសាស្ត្រ អ្នកនយោបាយព្យាយាមប្រមែប្រមូលអ្នកគាំទ្រខ្លួនឱយកាន់តែច្រើន។ ទាំងនេះជាប្រយោជន៍របស់ Internet ព្រោះពត៌មានអាចសាយភាយបានទៅគ្រប់ទីកន្លែងទាំងអស់ដែលមានប្រព័ន្ធទំនាក់ទំនង ហើយមិនចាំបាច់ចំនាយច្រើនលើការបោះពុម្ពផ្ទាំងផ្សាយពាណិជ្ជកម្ម ឬក្រដាសសារពត៌មានរាប់រយផ្ទាំង។
បើអ្នកមានចំនាប់អារម្មណ៍( និង ពេលវេលាផងដែរ) អ្នកអាចចាប់ផ្ដើមសរសេរអំពីសកម្មភាពខ្លួនអ្នកផ្ទាល់។ បន្ទាប់មកអ្នកនឹងដឹងថាអ្នកមានជំនាញខាងណាមួយពិតប្រាកដ ដែលអាចទាក់ទាញអ្នកអានត្រលប់មកទំព័រអ្នកជានិច្ច។ ប្រការគួរជៀសវាងហើយដែលអ្នកផងកំរដាក់ខ្លួនចូលពិភាក្សាផងនោះ គឺ ប្រធានបទណាដែលទាក់ទងទៅនឹងនយោបាយ សិច ការប្រកាន់ពូជសាសន៍ និង ការប្រកាន់ជំនឿសាសនា។ បើអ្នកយល់ថាអ្នកមានចំនេះដឹងគ្រប់គ្រាន់សំរាប់ផ្សព្វផ្សាយ និង ឆ្លើយតប វិចាររបស់អ្នកអាន (ប្រាកដជាមានទាំងអ្នកគាំទ្រ ទាំងអ្នកប្រឆាំង) អ្នកអាចសាកល្បងបាន។
កំនត់ហេតុរបស់អ្នកមិនចាំបាច់ជាសំនេរអត្ថបទនោះទេ។ កំនត់ហេតុខ្លះបង្ហាញរូបភាព(photoblog) ខ្លះទៀតមានតែសំលេង (podcast) ខ្លះទៀតមានជាឈុតវីដេអូខ្លីៗ (videoblog) តាមការច្នៃប្រឌិតនិងភាពប៉ិនប្រសប់របស់ម្ចាស់ទំព័រ។ អ្វីដែលខ្ញុំនិងអ្នកអានឯទៀតចង់បាននោះ គឺខ្លឹមសារដែលមិនទាន់មានគ្រប់គ្រាន់នៅឡើយសំរាប់ការស្រាវជ្រាវ ជាពិសេសជាភាសាខ្មែរ។
ជូនពរសំនាងល្អ (ហើយកុំភ្លេចណា ខំរៀនផង!)។
ប៉ាកកាជជុះ 
06/02/2009 ម៉ោង 5:28 ល្ងាច
នារីប្រភេទណា ជាទីស្រលាញ់ របស់បុរស?
សូមអាន ៖
http://mitleap.com/forum/topics/2262081:Topic:16976
07/02/2009 ម៉ោង 9:25 ព្រឹក
ម្ចាស់ប្លក់ពិតជារៀបចំអត្ថបទបានល្អមែន។
09/02/2009 ម៉ោង 7:39 ព្រឹក
នេះជាការណែនាំល្អ ។ អរគុណវីរៈ!
10/02/2009 ម៉ោង 9:44 ព្រឹក
ខ្ញុំសាកល្បងសរសេរឱយបានលហ៍មើល ព្រោះកាលពីវិទ្យាល័យខ្ញុំមិនដែលប្រលងតែងសេចក្ដីបានលើមធ្យមទេ។ ខ្ញុំនឹងព្យាយាមសរសេរថែមទៀត។ បានតែសំនេរនេះឯងខ្ញុំអាចធ្វើបាន ព្រោះកម្មវិធីតុបតែងល្អៗក៏ខ្ញុំមិនចេះ កាមេរ៉ាថតរូប ថតវីដេអូក៏មិនទាន់ស្គាល់រសជាតិនឹងគេ។
10/02/2009 ម៉ោង 11:58 ព្រឹក
យី! កម្សត់ម៉េះ? ខ្ញុំក៏អត់ដែលស្គាល់ជាតិដូចតែគ្នាហ្នឹង 😉
26/07/2011 ម៉ោង 1:16 ព្រឹក
សំនេរ ប្រធានបទ មនុស្សយើងត្រូវមានកត្វកិច្ចចូលរួមអភិវឌ្ឍសង្គម